HATAW! D'yaryo ng Bayan hatawtabloid.com
ni ROSE NOVENARIO
NANAWAGAN ang mga pambansa at pandaigdigang samahan ukol sa karapatang pantao kabilang ang Amnesty International (AI) sa gobyernong Filipino na itigil at wakasan ang ‘red-tagging’ dahil nalalagay sa panganib ang mga biktimang nababansagan nito.
Ayon sa AI, ang mga nagtatanggol sa karapatang pantao at iba pang aktibista ay dumaranas ng marahas na pag-atake kabilang ang pamamaslang, pananakot ng mga hindi kilalang indibidwal, at higit sa lahat pag-aresto at padedetine sa mga nababansagang ‘pulahanes.’
Ayon sa isang human rights advocate, ang ‘red-tagging’ ay tila ipinataw na sentensiya ng kamatayan sa nabansagan nito.
Nitong nakaraang linggo, pinaslang ang isang babaeng doktor na opisyal ng Inter-Agency Task Force (IATF) on Emerging Infectious Diseases na iniugnay sa mga rebeldeng komunista, at kanyang mister nang tambangan ng motorcycle-riding gunmen sa Guihulngan City, Negros Oriental kamakalawa ng gabi.
Kung gaano kabilis maglabas ng pahayag ang Malacañang kapag may namamatay na personalidad, politiko o negosyante, nakabibingi ang katahimkan ng mga opisyal ng Palasyo at ng IATF sa karumal-dumal na pagpaslang kay Dr. Mary Rose Sancelan at asawang si Edwin sa Barangay Poblacion, Guihulngan City kamakalawa ng dakong 5:30 ng hapon.
Batay sa ulat, si Sancelan ang city health officer ng Guihulngan at incident commander ng IATF sa siyudad.
Ayon sa human rights group Karapatan, ang doktor ay kasama sa hit list ng anti-communist group na Kagubak at tinukoy na target ng asasinasyon dahil sa alegasyon na siya ang tagapagsalita ng Leonardo Panaligan Command ng New People’s Army (NPA) sa Central Negros.
Kasama rin umano sa listahan sina Atty. Anthony Trinidad at Heidie Malalay Flores na pinatay nitong nakalipas na mga taon.
Kaugnay nito, kinondena ni Bishop Gerardo Alminaza ng San Carlos sa Negros Island ang pagpaslang sa doktor at sa kanyang asawa at tinawag ang krimen bilang “unwelcoming of the spirit of the Season of Christmas.”
“If the government cannot protect us, who else will? If the government cannot protect us, how are we ordinary citizens to be expected to trust this government?” sabi ni Alminaza.
Umaasa ang obispo na magkakaroon ng mabilis at determinadong imbestigasyon sa pagpaslang sa mag-asawa at hiniling sa lahat na ipanalanging magwakas na ang patayan.
“Join me in prayer in the face of unstoppable murders in our Diocese. Join me in hope that these killings will soon end,” aniya.
“But join me, too, in condemning, in the strongest possible terms, the senseless murder of helpless civilians and dedicated servants of government,” dagdag niya.
“Today, more than ever, the Filipino families do not deserve this senseless gift of violence,” giit ni Bishop Alminaza.
Sa ilalim ng international law at iba pang pamantayan, ang Filipinas ay may obligasyon na pangalagaan at proteksiyonan ang karapatan para sa lahat, kagilang ang karapatang mabuhay, kalayaang makapagpahayag, at kalayaang para sa payapang pagtitipon, na ginagarantiyahan ng International Covenant on Civil and Political Rights (ICCPR) na ang bansa ay isang state party.
