HATAW! D'yaryo ng Bayan hatawtabloid.com
GALIT ang naramdaman namin sa taong nagnakaw ng malaking halaga sa negosyong tinapay na pag-aari nina Ka Anthony Taberna at asawang Ka Rossel Taberna.
Bakit kami galit? Dahil alam naman ng taong ito na may kinakaharap na malaking problema ang mag-asawa dahil ang anak nilang si Zoey ay maysakit na leukemia at malaking halaga ang kakailanganin nito.
Base sa kuwento ni Ka Tunying sa Magandang Buhay nitong Martes, ang sama ng loob niya sa taong pinagkatiwalaan niya.
Emosyonal na kuwento ng broadcaster, “Mayroon kaming isang bagay na kanina pa namin pinag-uusapan kung pwede naming i-share rito sa ‘Magandang Buhay.’
“Isipin mo hirap na hirap kami. Alam mo ‘yung pagpapagamot sa katulad ni Zoey, sa kanyang kondisyon, mabigat ‘yon. Minsan napupuntahan niyo itong Ka Tunying’s nadiskubre namin two weeks’ o three weeks ago lamang na kami pala ay ninanakawan ng taong pinagkakatiwalaan namin dito sa kompanya.
“Eh, sabi ko napakahirap naman ‘yung ganoong sitwasyon at hindi maliit na halaga ‘yung kinuha sa kompanya. Kumbaga kumita ka ng kaunti sa pagtitinda ng tinapay, iniipon mo ‘yon tapos kukuhain lang ng ibang tao.”
Dagdag pa, “Sobrang sakit sa pakiramdam. Kaya ang sitwasyon namin ngayon ‘yung tao ay inihahanda namin ang kaso sa kanya. Tinitingnan din namin ang pananagutan ng banko. Kasi malaking halaga.”
Inamin ni Ka Tunying na baka isara nila ang kanilang negosyo kapag hindi nagawan ng paraan.
“Sabi ko nga, kundi namin mareremedyuhan ngayon ang nangyari, masakit man ipinagtapat ko na sa manager namin na baka ihanda natin ang sarili natin sa pagsasara ng kompanya. Sobra kasing laki niyong nawala kaya napakahirap ng pangyayari ngayon,” sambit nito.
At kahit maraming pagsubok na dumarating sa buhay nina ka Tunying at ka Rossel ay positibo silang malalampasan nila ito at nanatili ang tiwala nila sa Panginoong Diyos.
FACT SHEET
ni Reggee Bonoan
