HATAW! D'yaryo ng Bayan hatawtabloid.com
VHONG Navarro is back para sa ikalawang libro ng Mang Kepweng: Ang Lihim ng Bandanang Itim na mapanonood simula ngayong Disyembre 25 hanggang Enero 8, 2021.
Sa virtual mediacon ng MK2 nitong Martes ng gabi ay inamin ni Vhong na hindi siya masyadong kabado ngayon dahil hindi niya makakatunggali sina Vice Ganda, Coco Martin, at Vic Sotto na taunang may entry sa MMFF.
“Siyempre ‘yung totoo, nabawasan ‘yung kaba ko, kanti. Kasi siyempre iba ‘yung Vice, iba ‘yung Bossing, iba ‘yung Coco, eh. ‘Di ba kapag filmfest, every year
‘yan, makikita mo sila, talagang banggaan ‘yan sa takilya,” katwiran ng komedyante.
Pero may panghihinayang pa rin dahil hindi ito mapapanood sa mga sinehan kundi sa online platform sa pakikpagtulungan ng Globe at Upstream.ph sa halagang P250 na buong pamilya ay maaari nang makapanood ng isang pelikula.
“Masaya dahil nakapasok kami, ang ‘Mang Kepweng.’ Kaya lang nandoon ‘yung konting lungkot kasi nga hindi tulad nang ini-expect natin na film fest.
“Ito ‘yung makabago. Na ang ie-enjoy na lang natin dito ay kung paano tayo papasok sa makabagong paraan at kung paano mae-enjoy pa rin ng tao na para silang nanonood sa totoong sinehan.
“Ang importante kasi rito ay kasama mo ang family mo. Basta para sa akin itong ‘Mang Kepweng’ ay ibinigay ko po ‘yung best ko at ibinigay namin ang
best naming lahat, kaya sobrang saya ko,” sambit pa ng aktor.
Ayon kay Vhong ay suportado ni Vice ang Mang Kepweng: Ang Lihim ng Bandanang Itim dahil kasama sa pelikula ang kanyang boyfriend na si Ion Perez.
“‘Yun po nagsabi naman po siya, hindi ko alam kung sa live o sa taping niya binitawan. Kasi parang sinabi niya roon na wala muna akong Metro Manila
Film Festival ngayon pero naka-support ako ngayon kay ‘Mang Kepweng,” kuwento ni Vhong.
Bukod kay Vhong ay kasama rin sina Jaclyn Jose, Barbie Imperial, Ritz Azul, Joross Gamboa, Fumiya Sankai, Yamyam Gucong, at Ryan Bang,
mula sa direksiyon ni Topel Lee at produced ng Cineko Productions at Star Cinema.
FACT SHEET
ni Reggee Bonoan
