HATAW! D'yaryo ng Bayan hatawtabloid.com
MAKARAAN ang siyam na buwan na paulit-ulit na panawagan ng iba’t ibang grupo para sa free CoVid-19 mass testing, inihayag ni Pangulong Rodrigo Duterte na hahanap siya ng paraan upang maisakatuparan ito.
Depensa ni Presidential Spokesman Harry Roque, hindi totoo na masyado nang huli ang diskarte ng Pangulo para sa free mass testing.
“Hindi po totoo iyan. Sa mula’t mula po ang ating prayoridad ay i-improve ang ating testing capacity kaya nga po ngayon, tayo po ngayon ay isa sa may pinakamataas na testing capacity sa buong Asya,” sabi ni Roque sa virtual press briefing kahapon.
Sa kanyang public address kamakalawa ng gabi, sinabi ng Pangulo na gusto niyang gawing libre ang CoVid-19 test sa bawat Pinoy dahil obligasyon ng gobyerno na bigyang proteksiyon ang kanyang mamamayan.
“So, is there a way that we can spend for all of this testing? Makabili tayo, makamura tayo, kung may pera pa maghanap tayo so that it is actually to me the sacred duty of government to protect its citizens,” aniya.
“Tingnan ko kung may pera at magbili na lang tayo and in all government hospitals or in health centers, maibigay natin libre. Free of charge. Target the first or second quarter if you can have a program where I can review and look for the money,” dagdag ng Pangulo.
Kitang-kita aniya ang problema sa kakayahan ng tao na makapag-swab test sa mga paliparan na ang mga pasahero ay kailangan magpakita ng negative swab test result bago makasakay ng eroplano.
Inutusan niya si Health Secretary Francisco Duque III na magbalangkas ng programang free swab test sa first quarter ng susunod na taon.
Nagtakda ng price cap para sa presyo ng CoVid-19 test noong nakalipas na buwan, sa private laboratory ay P4,500 hanggang P5,000 habang sa government laboratory ay P3,800 at sagot ng PhilHealth ang P3,409 kaya’t halos P400 ang babayaran ng bawat tao.
Gusto ng Pangulo sa mga hotel manatili ang mga magpopositibo sa CoVid-19 kahit wala pa sa critical level ang capacity, ang mega quarantine centers na itinayo sa panahon ng pandemya.
“Sa report din kahapon ni Secretary Duque e wala pa po sa 50% iyong ating isolation facilities. Pero ito po ay preparasyon dahil alam natin na iyong tracing at isolation ay crucial po para labanan itong virus na ito kaya dinadamihan po natin ang ating facilities nang sa ganoon lahat ng na-expose ay mabigyan po ng mandatory quarantine facility,” paliwanag ni Roque sa hirit ng Pangulo kaugnay sa mga hotel. (ROSE NOVENARIO)
