Sugatang pulis sinabitan ng medalya ng CL Top Cop (Dinalaw sa ospital)

PERSONAL na dinalaw sa pagamutan, sinabitan ng medalya ng Sugatang Magiting (PNP Wounded Medal) at pinagkalooban ng tulong pinansiyal ni PRO3 Director P/BGen. Valeriano “Val” de Leon ang sugatang si P/Cpl. Mark Joseph Tangonan, intel operative ng San Jose City Municipal Police Station sa lalawigan ng Nueva Ecija, nitong Linggo ng gabi, 6 Disyembre.

Pinapurihan ni De Leon ang tapang at tatag na ipinakita ni Tangonan sa kanyang pagganap sa tungkulin bilang parte ng anti-narcotics operative sa isinagawang entrapment operation sa Sto. Niño 1st, umaga ng 6 Disyembre sa nasabing lugar.

Nauwi ito sa shootout at nagresulta sa pagkamatay ng mga suspek na sina Bryan Leonile Dris, top 3 sa most wanted drug personalities sa regional level ng Procor; at Hymer Leung, top listed drug personality ng lungsod ng Baguio, habang nakatakas ang isa pang kasamahan ng mga suspek na tinutugis sa follow-up operation. (RAUL SUSCANO)