Mangingisda, timbog sa shabu (Lumabag sa curfew)

REHAS na bakal ang kinasadlakan ng isang mangingisda matapos makuhaan ng shabu nang sitahin ng mga tauhan ng Maritime Police dahil sa paglabag sa curfew hours sa Navotas City, kahapon ng madaling araw.

Kinilala ni Maritime Police Station (MARPSTA) Major Rommel Sobrido ang naarestong suspek na si Arnel Alegue, 40 anyos, residente sa Isda St., Navotas Fish Port Complex (NFPC), Barangay NBBN.

Sa report ni Maj. Sobrido kay Northern NCR MARPSTA Col. Ricardo Villanueva, dakong 1:20 am, nagpapatrolya ang mga tauhan ng Navotas Maritime Police sa Isda St., NFPC, Barangay NBBN nang sitahin ang suspek dahil sa paglabag sa curfew hours.

Tinangkang tumakbo ng suspek ngunit nahawakan siya ni Pat. Dmitri Chase Valero ngunit nagpapapalag at nang hilingin ni Pat. Nikki Pepito na ilabas ang laman ng kanyang bulsa, nahulog ang isang plastic sachet ng hinihinalang shabu na nasa P500 ang halaga.

Ayon kay MARPSTA P/SMSgt. Bong Garo II, mahaharap ang suspek sa kasong paglabag sa city ordinance kaugnay ng curfew, Disobedience to Agent of Person in Authority) at paglabag sa Comprehensive Dangerous Drugs Act of 2002.

(ROMMEL SALES)