Ogie Diaz at Donita Nose, niresbakan si Michelle

NAGMUMUKHANG “tokwang-tokwa” ngayon ang mga naniwala roon kay Michelle Lhor Banaag, na inaapi sila at ginugutom pa ng komedyanteng si Super Tekla. Inakusahan pa niyon si Tekla na pinipilit siyang makipagtalik kahit na masama ang kanyang pakiramdam, at gumagawa ng kahalayan kahit na may kaharap na mga bata. Matapos na may mga naniwala sa kanya at inakusahan si Tekla ng abuso at sinabihang dapat makulong, naglabasan naman ang mga nakakakilala sa kanila.

Nauna nang nagsalita ang manager ni Super Tekla na si Rose Conde, at sinabing hindi totoo ang sinasabi ni Michelle, at ang totoo ay nagagalit lang iyon dahil hindi niya mahingan ng pera ang komedyante. Umayon din naman doon ang komedyante ring si Donita Nose at maging ang komedyante at writer na si Ogie Diaz.

Pero ang matinding lumabas ay iyong sinasabi ng isang Marlon Limpin, na nagpakilalang manager siya ng Klowns, at nagsabing gamit ang cellphone ni Super Tekla habang tulog ang komedyante, umutang si Michelle ng P20K. At dahil inakala niyang si Tekla talaga iyon, pinautang niya. Ginawa rin daw iyon ni Michelle kina Donita Rose, Boobay at maging kay Rose Conde.

Pero ang pinakamatindi ay ang sinabi ng apo ni Mang Dolphy na si Rowell Quizon na isa ring singer sa comedy bar. Sinabi niyang abusado si Michelle at niloloko lang si Tekla, dahil iyang si Michelle ay “tomboy at may jowang babae na kasama mo pa kung nagpe-perform si Tekla.” Kasama raw ang iba pang mga kaibigan, nagkikipag-inuman si Michelle na ang nagbabayad ng lahat ay si Tekla. “Kung minsan abonado pa si Tekla dahil mas malaki ang binayaran sa inuman nila kaysa kinita niyong tao. Pero hindi siya kumikibo dahil mahal ka niya.”

Marami ang natauhan, maski kami rin, nang mabasa namin ang post na iyon ni Rowell. Talagang masasabi mong “tokwang-tokwa” ka talaga kung naniwala ka kay Michelle.

Ed de Leon