HATAW! D'yaryo ng Bayan hatawtabloid.com
ISANG 7-anyos batang lalaki ang napatay ng kanyang sariling ama nang sapilitang subuan ng pagkain at suntukin sa ulo at katawan dahil ayaw umanong kumain ang anak sa Taguig City, nitong Sabado ng gabi.
Binawian ng buhay bago idating sa Taguig-Pateros District Hospital ang biktimang si Johncel Pedriguez, ng Road 39, Block 5, Lot 12 Barangay North Daang Hari, Taguig City.
Dinakip nina Pat. Jensen Jones Ramos at P/Cpl. Jordan Dimayag ng Tanyag Daang-Hari Sub-Station 8 ng Taguig Police at nakatakdang sampahan ng kasong parricide ang suspek na si Arnold Perdiguez, 28 anyos, matapos ireklamo ng live-in partner, ina ng biktima, na si Luz Montales.
Ayon sa imbestigasyon ng Taguig Police, pinapakain ng suspek ang kanyang anak dakong 9:00 pm nang subuan ito pero ayaw kumain umano ng bata na ikinagalit ng suspek at pinilit pang subuan bago pinagsusuntok sa ulo at katawan.
Dakong 4:34 am nang mapansin ang kakaibang hitsura ng anak kaya isinugod ng mag-asawa sa nasabing ospital pero hindi na ito umabot nang buhay dakong 4:42 am nang ideklarang dead-on-arrival ni Dr. Mary Ann Perez.
Sa pulisya, ikinatuwiran ng suspek, dinidisiplina lamang niya ang anak at walang intensiyon na masama.
(JAJA GARCIA)
