‘Pulis-pulisan’ nasakote sa tinangay na SUV

NASAKOTE ng mga tauhan ng Philippine National Police – Highway Patrol Group (PNP-HPG) ang isang ‘bogus na pulis’ na tumangay ng isang Mitsubishi Mirage sa Makati City.

 

Kinilala ng pulisya ang suspek na isang James Fuentes, 29 anyos, naninirahan sa Purok Uno Napindan, Taguig City.

 

Sa ulat, noong 25 Setyrembre 2020, dakong 11:55 am nasakote ang suspek sa Mayapis St., matapos masangkot sa pahgtangay ng isang Mitsubishi Mirage  at nagpanggap na aktibong miyembro ng pulisya.

 

Ang madaliang pagkakadakip kay Fuentes ay dahil sa masusing imbestigasyon na isinagawa ng mga tauhan ng ahensiya sa pangunguna ni P/Cpt. Michael Villar, kasama sina P/Cpt. Rannie Jose Estilles, P/EMSgt. Joel Alcantara, P/SMSgt. Abdulwahid Dimanalao, P/SSgt. Eduardo Bautista, P/SSgt. Eduardson Manucum, at Pat. Lindon John  Baron.

 

Bago masakote, si Fuentes ay sinita ng mga tauhan ng HPG dahil walang plaka ang sinasakyang motorsiklong Kawasaki Rouser.

 

Nagulat ang mga awtoridad dahil ang kanilang sinita ay nakasuot ng HPG lower breeches na mayroong pantaas na MCRC rider shirt at may PNP-HPG logo, isang kalibre .45 baril na may anim na pirasong bala, may serial number 1460911, ngunit walang lisensiyang naipakita.

 

Matatandaang naunang humingi ng saklolo kay dating HPG Special Operations Division (SOD) P/Cpt. Edgar Regidor Miguel si Jedd Vincent Vansol matapos na mabigo si Fuentes na ibalik ang sasakyang Mitsubishi Mirage, may conduction sticker number B61800 na nakapalangan sa kanyang kapatid.

 

Bukod dito, nagbanta at nagpakilalang pulis saka pinaikot-ikot ni Fuentes si Vansol, bagay na kanyang ikinabahala kaya humingi ng saklolo sa HPG.

 

Noong 15 Marso 2020 ng hatinggabi, narekober ang sasakyan ng kapatid ni Vansol sa isang gasolinahan sa J.P. Rizal Ave., Guadalupe Viejo.

 

Matapos ito ay naberepika sa PNP PAIS na walang ‘James Fuentes y Duroy’ na aktibong miyembre ng PNP.

 

Dahil dito, sinampahan ng kasong paglabag sa R.A. 10591 o paglabag sa Comprehensive Laws on Firearms and Ammunitions, matapos mabatid na walang kaukulang papeles na nakapangalan sa suspek ang baril na narekober sa kanya ganoon din ang usurpation of authorithy dahil sa pagpapanggap bilang alagad ng batas. (NIÑO ACLAN)