Kilalang aktres, nagsiguro; manager, iniwan

ISA sa mga araw na ito ay puputok na ang balita tungkol sa kilalang aktres na nagbago na ng management company na ikinabigla ng dating may hawak sa kanya dahil tila hindi sila nasabihan o o nasabihan pero hindi pinansin.

Kasalukuyang may ginagawang teleserye ang kilalang aktres at nagulat na lang ang mga taga-production nang sabihan sila ng handler ng kilalang aktres na lahat ng nangyayari o pagbabago at mga kakailanganin niya sa serye ay ipaalam sa bago nitong management.

Bakit daw biglaan at walang sabi-sabi na may bago na palang manager ang kilalang aktres? Kaya kaagad tinawagan ang dating namamahala sa karera niya at nagkaroon ng emergency meeting na hanggang sa ngayon ay wala pa kaming balita kung ano ang nangyari.

Masasabing isa ang kilalang aktres sa prime artist ng TV network pero dahil sa hindi inaasahang pangyayari ay nagpaka-siguro siya ng bagong management na hindi niya alam ay sa nasabing network din naman humihingi ng project ang management para sa mga talent nila.

Anyway, abangan ang mga susunod na kabanata tungkol sa aktres kung ano ang updates. (Reggee Bonoan)