25-anyos todas sa saksak

NAPATAY sa saksak ang 25-anyos lalaki habang sugatan ang kaniyang kaibigan makaraan magkaalitan ang grupo, sa Lower Bicutan, Taguig City, nitong Linggo.

 

Kinilala ni Taguig City Police Chief P/ Col.Celso Rodriguez ang biktimang namatay na si Jefrey Victoria, ng 25D 13th Street, Purok 6B, Lower Bicutan, Taguig na idineklarang dead on arrival sa Taguig-Pateros District Hospital.

 

Ginagamot sa nasabi rin ospital ang biktimang si Aries Monteclaro, 23, empleyado ng J&T Express, taga-3920, Road 3, Purok 6B Lower Bicutan, Taguig City.

 

Nahuli sa isinagawang follow-up operation ng mga pulis ng mga suspek na sina Ilma Joy Villaflores, (babae), 28, ng 24 Ipil-Ipil St., Lower Bicutan; Michael Magayon, 25, construction site inspector, ng No. 2920 Patricio St., Lower Bicutan; at John Maurence Agbayani, 21, ng 15 Ipil-Ipil St., Lower Bicutan, sa Taguig City.

 

Sa naantalang ulat ng Taguig Police Station, naganap ang insidente sa tapat ng bahay ng suspek na si Villaflores sa 24 Ipil-Ipil St., Lower Bicutan, Taguig City.

 

Nabatid sa imbestigasyon, unang nagkaroon ng pagtatalo sa pagitan ng mga suspek at biktima hanggang pagtulungang bugbugin ang dalawang biktima.

 

Sa gitna ng kaguluhan naglabas ng patalim si alyas Jhon-jhon saka inundayan ng saksak sa dibdib si Victoria at Monteclaro na nasaksak sa likod.

 

Nadala ng mga kaanak sa pagamutan ang dalawa pero minalas na tuluyang bumigay si Victoria.

 

Kahapon, 14 Setyembre, ng umaga nahuli ang mga suspek sa follow-up operation ng mga tauhan ng Taguig Sub-station 10 at Barangay Security Force ng Lower Bicutan Taguig City. (JAJA GARCIA)