Paolo Contis, ‘di na makapagtali ng sapatos sa katabaan

KARAMIHAN sa mga artista ngayon na panahon ng pandemya ay nagsilusugan kaya magugulat ka na lang kapag nag-post sila sa kanilang mga social media.

Pero ang iba ay conscious pa rin lalo na ‘yung may mga umeereng programa at ‘yung mga adik sa pag-e-exercise kaya napapanatili nila ang kanilang magandang pigura.

 

Isa na si Paolo Contis sa hindi vain sa hitsura niya kaya naman lumaki siya nang husto sa ilang buwang work from home.

 

Pero isang araw ay nagising na lang siya na kailangan na niyang tanggalin ang excess fats niya dahil dumating sa puntong hindi na niya maitali ang sintas ng sapatos niya kaya panay ang juicing niya.

 

Kuwento ni Paolo, “Ang hirap! Ako kasi kapag may trabaho lang, at saka lang ako magdiyeta. Kasi gusto ko mag-enjoy.

 

“Siyempre ngayong quarantine, kumakain ka na nga, ‘di ka pa gumagalaw. So, habang lumalaki ka, nagmamanas ka. ‘Yung paa ko nagmanas, eh. Sabi ko sandali kailangan ko na yata (mag-diet) at medyo may hingal na.”

 

Nabanggit ni Paolo na anim na araw siyang puro juicing lang at isang araw lang siya kakain, kumbaga cheat day niya.

 “So far I’m happy with my juicing. Ano ako eh, six days na juice, one day na break Naglalakad-lakad na rin ako ngayon at nagdya-jogging sa village.

 

“Para ano na rin, nahihirapan na ako magtali ng sapatos eh. It’s the health more than the physical, weight, and everything. Mas gusto ko siyempre healthy. Siyempre malaking panlaban mo ‘yan sa sakit, sa Covid, ‘di ba?” sabi pa.

 

FACT SHEET
ni Reggee Bonoan