Neil, ‘di type ang ipinagluluto siya ni Angel

HINDI pala type ni Neil Arce na ipinagluluto siya ng fiancée niyang si Angel Locsin dahil baka hindi siya masarapan, eh, maobliga siyang kainin ito. Ito ang inamin ng aktres sa panayam niya sa #Livewith G3 na naka-post sa YouTube channel.

Napag-usapan kasi nina G3 San Diego at Angel ang Korea dramang Only You na ginawan ng Pinoy version at leading man ng aktres dito si Sam Milby na dumayo pa sila ng Korea para sa shooting.

Sabi ni ‘Gel, natuto siyang magluto kahit paano dahil sa seryeng iyon kaya ang tanong sa kanya ay kung ipinagluluto niya ang fiancé niya.

Kuwento ng dalaga, “ayaw niya, eh!  Siya ‘yung nagsabing (‘wag na). Sinabi niya sa akin ‘yan noong umpisa palang. Siyempre pasikat ka (nagluto siya) sa umpisa gusto mong magluto. Hindi sa ayaw niya (ipagluto ko siya), paano kung hindi niya magustuhan, so obligado siyang tikman, so sabi niya’wag na lang’ so okay, sabi ko.

“Mayroon kaming cooking classes na pinupuntahan. Kasi kapag nagta-travel kami hindi naman kami ma-party, kasi nga business ni Neil ang bars, so ‘pag nagta-travel kami gusto naming matuto sa culture o something about to improve ourselves ‘di ba? Nag-a-attend kami ng mga cooking classes, ramen o pasta making, so game naman siya sa mga ganoon.”

Aminado si ‘Gel na mahilig siyang mag-aral tulad ng kinuha niyang short course ng fashion designing sa Europe, itong cooking lesson at iba pa.

“Kasi hindi naman natin alam ang lahat ng bagay kaya kailangan naming malaman kung ano ‘yung dapat nating i-improve sa mga sarili natin. Kung feeling mo empty ka sa part na ‘yun, eh, ‘di mag-aral ka hanggang sa matutuhan mo.

“Tulad niyan nag-aral ako ng fashion na hindi ko naman ginagawa, pero kapag may mga business meetings na may kinalaman sa designing, at least may knowledge pa rin ako roon hindi naman mawawala ‘yun,” paliwanag ng aktres.

 

FACT SHEET
ni Reggee Bonoan