HATAW! D'yaryo ng Bayan hatawtabloid.com
UMABOT sa mahigit 2M views ang pagtugtog ng piano habang kumakanta si Yohan Santos-Agoncillo, panganay nina Ryan at Judy Ann Agoncillo kaya naman trending ito sa social media kamakailan.
Parang kailan lang ay batang maliit pa si Yohan na laging kasama ni Mommy Carol Santos sa mga lakad niya pero heto at dalagita na.
Ang daddy Ryan ni Yohan ang nagbi-video sa kanya kapag tumutugtog siya at kumakanta kaya naman kapag may mali ang bagets ay mega-push ng TV host.
Minsang tumutugtog si Yohan at nalimuntan ang chord, ”sorry, I missed that chord.” Sagot naman ni Ryan sa anak, “again, okay Let’s cheer for ate.”
At dahil proud ang lola ni Yohan na si Mommy Carol ay talagang ipinadala sa amin ang video na humanga rin kami talaga.
Tinanong namin si Mommy Carol na puwedeng sumali si Yohan sa The Voice Kids.
Sagot kaagad ng lola, ”Walang planong isali sa contest, aral muna sabi ng nanay (Judy Ann) niya.
Edad 15 na si Yohan at nag-aaral sa Montessori.
Kuwento pa ni Mommy Carol, ”Si Ima Castro ang nagbibigay ng voice lesson kay bagets. Piano lesson sa area nila may nagtururo. Matagal na siyang nagpi-piano, guitar, at ukelele marunong din. Talented talaga ‘yung bagets. Mahiyain lang ‘pag kami kami lang at saka kumakanta at magaling ding sumayaw.”
Nakatutuwa na ang tatlong anak nina Ryan at Juday ay may kanya-kanyang talent, si Yohan sa music, si Lucho ay sa sports, at si Luna ay sa pagluluto dahil lagi siyang kasa-kasama ng nanay niya sa mga niluluto nito.
FACT SHEET
ni Reggee Bonoan
