Alden, nag-panic nang matengga sa bahay

NAPRANING si Alden Richards nang matengga ng ilang buwan sa bahay dahil sa pandemya na dulot ng Covid-19.

Eh sa tulad niyang laging on the go at hindi nawawalan ng showbiz commitment, malaking adjustment ang ginawa ni Alden para mapanatili ang sanity sa daigdig niya.

Malaking tulong ang pagiging gamer ng Asias Multimedia Star upang mawala ang anxiety, stress, at pag-iisip habang nasa bahay lang.

“Sobrang hirap ng adjustments na ginawa ko. May sarili rin kaming health protocols kapag galing kami sa labas.

“Sa likod ng bahay kami dumadaan, nagdi-disinfect, naliligo, at nagbibihis. Maingat kaming lahat sa bahay,” saad ni Alden sa zoom interview niya bilang bagong ambassador ng Cosmo Cee ng BARGN Farmaveutical Phils. Inc.

Mapalad pa rin si Alden dahil kahit walang regular na trabaho eh may produkto pa ring kumukuha sa kanya.

Kapag nag-resume na ang trabaho, pangarap ng Kapuso actor na makasama sa isang movie si Bea Alonzo na nakasama niya sa isang TV commercial.

 ”Na-starstruck ako sa kanya dahil eversince, fan nila ako ni John Lloyd Cruz!” diin ni Alden.

I-FLEX
ni Jun Nardo