Tulak na Tsinay inginuso ng kabayan timbog

NADAKIP ang babaeng Chinese national na kabilang sa high value target (HVT) nang ibuko ng kababayang nakakulong o person under police custody (PUPC) na nagsuplay sa kaniya ng droga, nitong Sabado ng hapon sa Pasay City.

Kinilala ang suspek na si Xueming Chen, 22 anyos, walang trabaho, ng Room 557, 5th floor Tower D, Shell Residences, Barangay 76, Zone 10, Pasay City.

Ayon sa ulat ng Station Drug Enforcement Unit (SDEU) ng Pasay Police na pinangunahan ni P/Capt. Cecilio Tomas, Jr., ikinasa ang buy bust operation laban sa suspek dakong 4:00 pm ng Sabado.

Isang poseur buyer ang nakabili ng shabu kaya agad hinuli ng mga operatiba ang suspek sa kaniyang unit at nasamsam ang 9 plastic sachet ng hinihinalang shabu na tumitimbang ng 11.7 gramo na nagkakahalaga ng P79,628, drug paraphernalia at ang buy bust money.

Agad nagsagawa ng follow-up operation ang SDEU laban kay Chen matapos sabihin ng PUPC na si Wen Bo, 33, Philippine Offshore Gaming Operator (POGO), residente ng Unit 1055 Tower A, Shell Residences EDSA Extn., Barangay 76 , Zone 10 , Pasay City na sinabing supplier ng shabu ang kababayan.

Una nang nahulihan ng tatlong gramo ng shabu na nagkakahalaga ng P20,400 na nakasingit sa food pack habang nakapiit sa custodial facility ng SDEU, 1:00 am ng Sabado, 11 Hulyo, matapos isagawa ang ‘Oplan Greyhound.’

Sa isinagawang interogasyon, ibinulgar ni Bo sa awtoridad na nagmula ang ilegal na droga kay Chen.-(JAJA GARCIA)