Roque hugas-kamay sa pagpapabitiw kay Leachon sa NTF Covid-19 (‘Pambansang laway lang ako.’)

UPANG patunayan na wala siyang kinalaman sa pagpapabitiw kay National Task Force on COVID-19 special adviser Dr. Anthony “Tony” Leachon, tila hugas-kamay na tinawag ni Presidential Spokesman Harry Roque ang sarili bilang “pambansang laway.”

“He (Leachon) is giving me too much credit, pambansang laway lang po ako, wala po talaga akong kapangyarihan na mag-compel sa kahit sino sa kanila na mag-resign,” tugon ni Roque sa pahayag ni Leachon na pinagbitiw siya sa task force nina Roque at Health Secretary Francisco Duque III dahil sa pagbatikos niya sa sablay na data management ng Department of Health (DOH) kaugnay ng pandemyang coronavirus disease (COVID-19) sa bansa.

Giit ni Roque, mismong si Pangulong Rodrigo Duterte ang nagsabi na hindi dapat sinasabi ni Leachon ang kanyang mga pahayag sa social media.

Matapos magbitiw sa task force kamakalawa ay inihayag ni Leachon na sinabi sa kanya ni Galvez na hindi kursunada nina Roque at Duque ang pagbatikos niya sa mga kapalpakan ng DOH.

“My manner of communicating to the public that is truthful, transparent, open and straightforward may not be aligned with the communication strategy of the Palace. I think that is where we disagreed,” ani Leachon.

Sa pagbibitiw ni Leachon, ipinagtanggol ng National Task Force on COVID-19 ang desisyon nilang hayaan magbitiw ang isa sa kanilang advisers, na inakusahang pinangungunahan ang kanilang mga krusyal na desisyon at nagiging dahilan ng dibisyon sa hanay ng mga ahensiya ng pamahalaan.

Dahil sa akusasyon, sinabi ni Leachon sa panayam: “Is this the price right now for telling the truth? Is this the price for being honest and transparent?”

Dagdag ni Leachon, “In crisis, we should not tolerate mediocrity. We should demand accountability.” (ROSE NOVENARIO)