HATAW! D'yaryo ng Bayan hatawtabloid.com
NAG-ALOK ng exchange deal si Defense Secretary Delfin Lorenzana sa Filipino insurgents na binabatikos ang planong pagbili ng Armed Forces of the Philippines (AFP) ng attack helicopters.
Sinabi ni Lorenzana, payag siya sa suhestiyon ng mga makakaliwang grupo na ibigay na lang sa tao ang P13 bilyones pondo ng AFP para ipambili ng attack helicopters kung ititigil ng New People´s Army (NPA) ang armadong pakikibaka.
Paliwanag niya, 50 taon ng nanggugulo ang NPA kaya naoobliga ang Defense department na mag-angkat ng armas pandigma para labanan sila.
“Ngayon, iyong komentaryo ng mga bumabatikos ng ganiyan ay sinagot ko na iyan kasi mayroon nagsabi na bakit daw … iyong mga leftist side, sabi ay bakit daw bibili tayo, bakit hindi natin ibigay na lang sa mga tao? Agree ako riyan. I agree that buying these helicopters is I think … we would rather give it to our people. Kaya lang ang sabi ko, itigil ninyo iyong inyong armed struggle at ititigil din namin ang pagbili ng ganitong armas. Kasi 50 years na kayong nanggugulo riyan, gusto ninyo mapigilan kaming mag-angkat ng mga panlaban sa inyo pero hindi ninyo naman ititigil iyong inyong ginagawang armed struggle,” giit ni Lorenzana.
Nauna rito, binatikos ng International Coalition for Human Rights in the Philippines- United States Chapter ang pagbibigay ng ‘go signal’ ng US State Department na magbenta sa Filipinas ng anim na Boeing Apache AH-64E at anim na Bell Viper Attack helicopters na nagkakahalaga ng US$2 bilyon o P100 bilyon.
Anang grupo, ang ipagbibiling armas pandigma sa Filipinas ay mapupunta lamang sa mga awtoridad na nagiging mas malupit sa ilalim ng ipinatutupad na community quarantine sa bansa dulot ng pandemyang COVID-19.
Ayon kay Lorenzana, mahal ang nasabing attack choppers ng Amerika at sa budget na P13 bilyon ng AFP, mas makabubuting tumingin muna sa ibang bansa ng mas mura para mas marami ang mabili. (ROSE NOVENARIO)
