Psychiatric evaluation, training ng AFP at PNP suhestiyon ng lady solon

NANAWAGAN si Rep. Niña Taduran ng ACT-CIS party-list ng malawakan at malalimang pagsasanay sa sikolohika (psychological training) ng mga tagapagpatupad ng batas upang mas maging epektibo sa paghawak ng mga sitwasyong may kinalaman sa mga taong may problema sa pag-iisip.

Ang panawagan ay ginawa ni Taduran makaraan ang pagkakabaril at pagkamatay ni Private First  Class Winston A. Ragos na nasita sa isang checkpoint sa Quezon City.

Ayon sa Asst. House Majority Floorleader, napigilan sana ang ganitong sitwasyon kung may kasanayan ang mga nagmamando sa checkpoint sa pagtugon sa mga may problema sa pag-iisip.

“Dapat ay nagpatupad ng maximum tolerance ang mga pulis lalo sa panahong ito ng enhanced community quarantine na halos lahat ay natatakot, nagagalit at nangangamba dahil hindi sigurado kung ano ang mangyayari sa mga susunod na araw dahil sa COVID-19,” ayon kay Taduran.

“Obvious namang may problema sa pag-iisip si Ragos dahil ayon sa report, dumeretso siya sa mga pulis na nagbabantay sa checkpoint at walang kaabog-abog na minura ang mga naroon nang walang dahilan,” dagdag ni Taduran.

Ayon sa mambabatas, sa ilalim ng  Republic Act Number 11036, kailangang pinoprotektahan ang karapatan ng mga may problema sa pag-iisip.

“Siguro panahon na rin upang tingnan ang Philippine Mental Health Act dahil hindi naman nito nasakop ang paraan kung paano tutugunan ng mga tagapagpatupad ng batas ang sitwasyong may kinalaman sa mga may problema sa pag-iisip,” ani Taduran.

Kailangan din dagdagan ang suportang medikal at psychiatric evaluation sa mga pulis at militar na nagkakaroon ng war shock o post traumatic stress disorder (PTSD) dahil sa pagganap sa kanilang tungkulin upang maiwasang maulit ang nangyari kay Ragos.

Si Ragos ay napag-alamang dating militar na isinabak sa labanan sa probinsiya at nagkaroon ng sakit na PTSD at schizophrenia. (GERRY BALDO)