HATAW! D'yaryo ng Bayan hatawtabloid.com
PUWEDE nang bumiyahe papunta at pabalik ng Hong Kong at Macau ang overseas Filipino workers (OFWs).
Ito ay dahil partially lifted na ang travel ban na ipinatupad noon ng Filipinas sa Hong Kong at Macau dahil sa coronavirus disease o COVID-19.Ayon kay Presidential Spokesman Salvador Panelo, kinakailangang lumagda ng deklarasyon ang mga OFW na nagsasaad na batid nila ang panganib sa pagbalik sa kanilang trabaho sa Hong Kong at Macau.
Maaari na rin aniyang pumunta sa Macau at Hong Kong o umuwi sa bansa ang pamilya ng mga Filipino maging ang mga holder ng permanent visa.
Sakop na rin ng partial lifting ng travel ban ang mga miyembro ng diplomatic corps.
Sinabi ni Panelo, ang paulit-ulit na hiling ng OFWs na alisin ang travel ban ang maaaring naging basehan ng Inter-Agency Task Force on the Management of Emerging Infectious Diseases (IATFMEID) para bahagyang alisin ang travel ban.
Wala aniyang dapat na ipag-alala ang OFWs sa pipirmahang deklarasyon dahil tutulungan pa rin sila ng gobyerno sakaling maapektohan ng COVID-19.
(ROSE NOVENARIO)
