‘Shabu-silog’ nabuko sa dalaw

BUKING ang ipupuslit na shabu na inihalo sa ‘hotsilog’  ng isang  27-anyos babae bilang pasalubong sa dadalawin niyang kaibigang naka­ku­long nang dumaan sa inspeksiyon ng mga awtoridad sa Fairview Police Station (PS5) sa Quezon City, nitong Martes ng madaling araw.

Sa ulat kay Quezon City Police District (QCPD) ni P/Lt. Col. Rosendo Magsipoc, hepe ng Fairview Police Station (PS5), ang  suspek ay kinilalang si  Camie Olaguer, 27, nakatira sa Brgy. Gulod, Novaliches, QC.

Ayon kay Magaipoc, dakong 3:00 am, dada­lawin ni Olaguer ang kaibigang si Bon Marco Medina, na nadakip noong nakaraang bu­wan dahil sa ilegal na droga.

May dalang kanin, hotdog at itlog o “hotsilog” na nakalagay sa styro si Olaguer, pero nang siyasatin ay may nakapailalim na apat na sachet ng shabu.

Itinanggi ng suspek na sa kanya ang droga at sinabing napag-utusan lang siya ng kaanak ng kaibigan.

Hindi man naibigay ang pasalubong na ‘shabu-silog’ tuluyan nang nakasama ng ‘dalaw’ ang nakakulong na kaibigan, habang inihahanda ang kasong paglabag sa Republic Act 9165 o Comprehensive Dangerous Drugs Act of 2002 laban kay Olaguer. (ALMAR DANGUILAN)