HATAW! D'yaryo ng Bayan hatawtabloid.com
POSIBLENG masampahan ng kaso ang mga kompanya ng langis at matanggalan ng certificates of compliance kapag hindi nabigyang katuwiran sa loob ng tatlong araw ang ipinatupad na “one-time, big-time” oil price hike.
Sinabi ni Energy Assistant Secretary Bodie Pulido, pinadalhan ng “show-cause order” ng Department of Energy (DOE) ang mga kompanya ng langis para pagpaliwanagin kung bakit nagpataw ng “one-time, big-time” oil price hike noong isang linggo.
Ito ay kahit may dati silang reserba at hindi pa naman nakaapekto sa presyo ang “drone attack” sa oil refineries ng Saudi Aramco kamakailan.
Bukod dito, pinagpapaliwanag din ng DOE ang mga kompanya ng langis kung bakit kulang ang ipinatupad nilang bawas-presyo o rollback sa petrolyo ngayong linggo.
Magugunitang P2.35 kada litro ang ipinataw na price adjustment sa gasolina dahil sa “drone attack” noong isang buwan habang P1.80 kada litro ang ipinatong sa diesel.
Mas mataas nang P0.22 ang itinaas sa presyo ng gasolina ng mga kompaniya ng langis habang P0.60 sa presyo ng diesel.
Sa kaso ng liquified petroleum gas (LPG), gusto rin marinig ng DOE ang paliwanag ng LPG retailers kung bakit mababa ang ipinatupad na price rollback mula sa sinabi nilang halaga ng taas ng presyo.
(ROSE NOVENARIO)
