HATAW! D'yaryo ng Bayan hatawtabloid.com
NANAWAGAN sa Department of Budget and Management si House Deputy Speaker Mujiv Hataman na bayaran ang separation pay at iba pang benepisyo ng 6000 empleyado na mawawalan ng trabaho sa pagpasok ng bagong Bangsamoro Autonomous Region in Muslim Mindanao.
Ayon kay Hataman, ang dating gobernador ng mawawalang Autononous Region in Muslim Mindanao (ARMM), dapat masiguro ng papasok na BARMM na mabayaran ang mga empleyado bago maglabas ng pahayag na uumpisahan nila ang proseso sa pagtatangal sa kanila.
“Nananawagan ako sa gobyerno ng BARMM at sa Department of Budget and Management (DBM) na siguruhin ang kapakanan ng mga empleyado ng ARMM na magtatapos ang serbisyo itong taon. Sana maayos ang kanilang mga benepisyo, pati ang kanilang matatanggap sa ilang taon nilang paninilbihan sa ARMM,” ani Hataman na nagsilbing gobernador ng rehiyon ng higit pitong taon.
“While we all aim at having a smooth transition from the previous regional government to the new Bangsamoro autonomous government, we should make sure that the welfare of these employees be also given utmost attention. And this includes paying their separation pay and other benefits at the earliest possible time,” dagdag niya.
Nagpahayag ang BARMM na mag-uumpisa na silang magtangal ng mga empleyado ng ARMM sa mga lugar na nasasakupan nito – Lanao del Sur, Maguindanao, Basilan, Sulu, Tawi-Tawi and Cotabato City.
“Ang mahirap kasi nito, may announcement na pero ayon sa DBM, wala pa ang mga dokumento sa kanila para masimulan ang proseso. Ayon din sa DBM, hindi nila kayang ayusin ng minsanan at sabay-sabay ang pagproseso ng kanilang dokumento. Kaya nag-iisip din kaming Bangsamoro legislators na magpasa ng isang resolusyon upang mapatawag ang DBM at representante ng Bangsamoro government para pag-usapan ang bagay na ito,” anang dating gobernador na ngayon ay Congressman ng Basilan.
“These are hardworking men and women who are public servants. So my appeal is that the DBM expedite their retirements, separation pays and other benefits,” ani Hataman.
(GERRY BALDO)
