MAGKATULONG na binubuhat ng mga tauhan ng punerarya ang bangkay ng biktima ng ambush na si Jesus De Guzman Dimayuga, retiradong airport transport supervisor, habang inilalabas sa kanyang sasakyan na Honda CRV, may plakang XGZ 906, agad namatay nang pagbabarilin ng lalaking nakamotorsiklo sa kanto ng Osmena Hi-way at Cailles St., Barangay Bangkal, Makati City, kahapon ng umaga. (ERIC JAYSON DREW)

Retiradong transport manager todas sa ambush

Jaja Garcia July 15, 2019 News

ISANG tama ng bala ng baril sa dibdib ang tumapos sa buhay ng 63-anyos transport manager makaraan barilin ng hindi kilalang suspek, sakay ng motorsiklo, habang nagmamaneho ng Honda CRV kahapon ng umaga sa Makati City.

Patay noon din sa pinangyarihan, ang biktimang si Jesus De Guzman Dimayuga, residente sa Bonifacio St., sa Barangay Bangkal ng nasabing lungsod, at sinabing dating konektado sa mga transportasyon sa Ninoy Aquino International Airport (NAIA).

Ayon kay P/Maj. Gideon Ines, hepe ng Investigation Detective & Management Branch (IDMB) ng Makati City Police, nangyari ang pamamaril sa Osmena Hi-way malapit sa Cailles St., dakong 8:25 am.

Agad tumakas ang suspek nang makitang duguan ang biktima sakay ng motorsiklo na nakasuot ng jacket na kulay olive green at nakasuot ng puting helmet.

Ayon kay Ines, nanggaling ang biktima kasama ang misis na si Ramona sa simbahan at habang minamaneho ni Dimayuga ang kanilang sasakyang Honda CRV, may plakang XGZ 906 sa Osmena Hi-way paliko sa Cailles St., biglang sumulpot ang motorsiklong walang plaka lulan ang suspek na agad binaril si Dimayuga.

Pahayag ng asawa ng biktima kay Ines, walang kaaway ang kanyang asawa, mabait at isang lay minister sa simbahan.

Sa ngayon ay patuloy na iniimbestigahan ang naturang kaso.

(JAJA GARCIA)