HATAW! D'yaryo ng Bayan hatawtabloid.com
MAAARING hindi ituloy ni Pangulong Rodrigo Duterte ang bantang magbibitiw sa puwesto kapag kumandidato sa pagka-Speaker ng Mababang Kapulungan ang kanyang anak na si Davao City First District Rep. Paolo Duterte.
Ayon kay Presidential Spokesman Salvador Panelo, posibleng magbago ang isip ng Pangulo at hindi tuparin ang pangakong resignation ngayong inihayag ni Paolo ang interes na maging House Speaker.
“E siguro he will wait for that to happen kung totoong mangyari. But you know, sabi nga e, ‘di ba sabi ko sa inyo, you make a position, you make a stand on the basis of circumstances, when those circumstances change, you also change your stand. So puwede rin magbago,” ani Panelo sa press briefing sa Palasyo.
Matatandaan noong nakalipas na 27 Mayo, sinabi ni Pangulong Duterte na magre-resign siya kapag sumali sa House speakership race ang anak na si Paolo.
Sa kalatas kahapon, sinabi ni Paolo na sasali na siya sa mga naghahangad na maging Speaker at ipinanukala ang term sharing gaya ng hirit ng kanyang ama.
Ayon kay Panelo, puwedeng magbago ng isip ang mag-ama kaya hintayin na lang ang susunod na kabanata.
“Puwede rin magbago ang isip ng Presidente, puwede rin magbago ng isip si congressman Paolo Duterte. Tingnan natin. Let it evolve,” dagdag ni Panelo.
ni ROSE NOVENARIO
