HATAW! D'yaryo ng Bayan hatawtabloid.com
ISANG sasakyan ng barangay ang pinaulanan ng bala ng hindi kilalang mga suspek sa Muntinlupa City kahapon ng madaling araw.
Sa ulat na natanggap ng Muntinlupa City Police, 4:20 am kahapon nang maganap ang insidente sa Marina Heights Avenue, Brgy. Sucat ng naturang siyudad.
Nabatid, habang nagkakape ang mga tanod na sina Roger Oliva Jr., Tauton Francisco Jr., at Florencio Dabu sa waiting shed, biglang pinaulanan ng bala ng hindi kilalang suspek ang sasakyan ng barangay.
Ang mga suspek ay sakay ng isang kulay itim na Starex at pagkatapos ay mabilis na nagsitakas.
Mabuti anila at walang nadisgrasya sa pamamaril maliban sa nabasag na salamin ng sasakyan ng barangay at maraming tama ng bala.
Iniimbestigahan ng pulisya ang naturang pamamaril at inaalam na rin ang pagkakakilanlan ng mga suspek.
(JAJA GARCIA)
