Asunto vs destabilizers malabo pa

HINDI pa idedemanda ng Malacañang ang mga personalidad na nabisto nilang nagsabwatan para pabagsakin ang admi­nistrasyong Duterte.

“Wala, hahayaan lang namin sila… sa ngayon ha, sa ngayon. Kasi if the plot thickens and they perform acts which are already violation of the penal laws, that’s a different story,” sabi ni Presidential Spokesman Salvador Panelo sa press briefing sa Palasyo kahapon.

Ang pahayag ay gina­wa ni Panelo kasunod nang napaulat na “Oust Duterte plot matrix”  na kinompirma niyang katu­lad ng hawak niyang do­ku­mento na galing kay Pangulong Rodrigo Du­terte.

Aniya, beripikado ang matrix na galing umano sa foreign intelligence source.

Nakasaad sa matrix ang pagpapasahan ng video footage ng isang alyas Bikoy ng mga taga-Vera Files, Rappler, Philippine Center for Investigative Journalism (PCIJ), at National Union of People’ Lawyers (NUPL).

“Ang ibig sabihin, the source is Bikoy, gumawa siya ng fake news, ipina­dala niya — hindi nga alam kung sino, obviously ano ‘yun pseudo name lang o kung sinuman iyon. Ipinadala niya kay Tordesillas, ipinadala naman ni Tordesillas doon sa tatlo, tapos ikina­lat na nila, iyon lang naman ang ibig sabihin nito,” paliwanag ni Panelo.

Matatandaan kama­ka­ilan ay naging viral ang mga video footage ni alyas Bikoy na nag-akusa kina dating Davao CityVice Mayor Paolo Duterte, dating Special Assistant to the President (SAP) Christopher “Bong” Go at presidential daughter Veronica “Kitty” Duterte na sang­kot sa illegal drugs.

Hindi tinukoy ni Panelo kung sino ang nasa likod ni alyas Bikoy.

(ROSE NOVENARIO)