HATAW! D'yaryo ng Bayan hatawtabloid.com
HUMAHATAW ngayon ang indie actor na si Ghel Natividad Tumbaga sa shooting ng dalawang movie. Ang isa ay Kalsada sa panulat at direksiyon ni Kim Gogola na gumaganap siya bilang isa sa lead cast. Ang isa pa niyang movie ay The Viral kasama si Zack Santos na Daniel Padilla look-alike.
Kailan lang ay pinarangalan si Ghel ng StarBuzz Awards 2019 bilang Best Character Actor para sa indie film na Ang Huling Hapunan ni direk Mark Agcaoili Bago na ginanap last Feb. 28 sa Cornerstone Studio ng ABS-CBN.
Mula sa pagiging make-up artist ng documentary program na iJuander ng TVNews11 at ng ilan sa alaga ni German Moreno sa dating show na Walang Tulugan with Master Showman ng GMA7, si Ghel ay nagsimulang sumabak sa indie movies noong 2015 via sa shortfilm na Beki’t Ako? ni Kaiser Reginaldo. Dito’y nanalo siya ng People’s Choice Award sa 2nd Inding-indie Film Festival.
Ipinahayag ni Ghel ang mga iniidolong aktor. “Gustong-gusto kong tularan ang mga idolo kong character at multi-awarded actors gaya nina Pen Medina, Rez Cortez, Albert Martinez, Eddie Garcia, at Coco Martin. Kung mabibigyan ako ng pagkakataon, pangarap ko silang makaeksena at makatrabaho,” aniya.
Bukod sa pagiging aktor, si Ghel ay isang salon owner, teleserye-talent, make-up artist, at host/event organizer. May advocacy siyang tumulong sa mga abused, abandoned, at less fortunate children na nasa pangangalaga ng House of Sarang sa Taguig City at Nayon ng Kabataan sa Mandaluyong City. Nag-aalay siya rito ng mga nalikom niyang mga gamit-pambata mula sa malalapit na kaibigan sa industriya at mayroon pang buwanang libreng gupit para sa mga bata, kasama ang mga tinuruan niya ng FreeSalon Skills training.
“Ito ang naisip kong paraan para magpasalamat sa Diyos sa talentong ibinigay Niya sa akin, ang makatulong sa munti kong paraan,” wika ni Ghel na tubong Rosario, La Union.
ALAM MO NA!
ni Nonie Nicasio
