Dinismis ng piskalya… Suspek sa Silawan ‘murder’ hulihin — Digong

IPINAAARESTO muli ni Pangu­long Rodrigo Duterte ang suspe sa pagpatay kay Christine Silawan na pinalaya ng piskalya.

Sinabi ng Pangulo sa kanyang talumpati sa Koronadal, South Co­tabat­o kamakalawa ng gabi na tinawagan niya ang fiscal sa Cebu City na nagpasya na pakawalan ang suspek sa pagpatay sa dalagitang binalatan ang mukha.

Ayon sa Pangulo, binigyang diin niya sa fiscal na dapat niyang i-recall ang inilabas na dismissal  at arestohin muli ang pinakawalang suspek.

Kaugnay nito ay ipi­na­liwanag ng pangulo ang hot pursuit rule.

Hindi aniya nangya­yari ang hot pursuit sa loob ng  24 oras lamang.

Iginiit ng Pangulo, habang iniimbestigahan ang isang kaso at nagsa­sagawa ng mga follow-up araw araw ang mga awtoridad, matatawag pa rin itong hot pursuit.

Naniniwala ang Pa­ngu­lo na ang kasong pagpatay kay Silawan ay resulta ng pagkalulong sa ilegal na droga ng suspek at iba pa niyang mga kasabwat.

Ayon sa Pangulo, sa klase ng krimen na nang­yayari nga­yon, masasa­bing lumala pa ang pro­blema ng bansa sa ilegal na droga.

Babala ng Pangu­lo, posibleng maging susu­nod na Mexico na ang bansa na kontrolado ng drug cartel ang gobyerno kapag hindi nasawata ang problema sa ipinag­babawal na gamot.

ni ROSE NOVENARIO