HATAW! D'yaryo ng Bayan hatawtabloid.com
BINATIKOS ng isang kongresista si Sen. Panfilo Lacson kahapon dahil sa umano’y pag-hostage sa panukalang 2019 national budget.
Ayon kay Rep. Anthony Bravo ng party-list na COOPnatco, may personal na galit si Lacson kay House Speaker Gloria Macapagal Arroyo kaya niya iyon ginagawa.
“Ngayon, pinaka-latest ho ngayon, the way I look at it, in my own assessment, Sen. Ping Lacson is holding the budget hostage because of personal vendetta to our Speaker GMA,” ayon kay Bravo, miyembro ng House minority bloc na pinamumunuan ni Quezon Rep. Danilo Suarez.
Si Suarez ay isang supporter ni Arroyo.
Ani Bravo, wala man lang sinabing mabuti si Lacson tungkol kay Arroyo mula nang umupo bilang speaker.
Aniya, wala naman siyang personal grudge kay Lacson pero sa tingin niya may agenda ang senador kay Arroyo.
“I think the agenda is clear: he doesn’t want the Speaker to be successful in her leadership as the Speaker, and it’s the budget. I know the majority of the senators want to pass the budget, but I wonder why they are quite about the remarks of their colleague, Sen. Ping. Are they afraid of something or do they have something to hide?” ani Bravo sa isang press conference sa Kamara.
Idinipensa ni Bravo ang Kamara.
“The House did not do anything illegal in the budget. I’ve been part of the Bicam, and I can attest that discussions were made,” paliwanag ni Bravo.
Sa panig ni Camarines Sur Rep. Rolando Andaya, ang problema ay nasa Senado.
Hindi, aniya, naka-itemize ang pondo ng mga senador at hindi rin nakalagay kung kaninong pondo.
ni Gerry Baldo
Walang bago sa alegasyon ni Andaya — Lacson
IGINIIT ni Senador Panfilo Lacson na walang bago sa mga alegasyon ni House Appropriations Committee Chairman Rolando Andaya sa umano’y realignment na ginawa ng mga senador.
Ayon kay Lacson, ang alegasyon ni Andaya na P75 bilyong ‘singit’ ay matagal nang pinag-usapan sa interpellation sa budget hearing sa senado.
Binigyang diin ni Lacson na nasa National Expenditure Program (NEP) ang inilagay ni DBM Secretary Benjamin Diokno pero hindi alam ni DPWH Secretary Mark Villar ay tinanggal na ng senado.
Sinabi ni Lacson, maging ang P25 bilyong realignment ng mga senador ay hindi na rin bago sa kanyang pandinig.
Itinama ng senador na hindi ito P25 bilyon kundi ito ay P23 bilyon na kanyang ibinulgar sa pagdinig sa senado.
Dagdag ni Lacson, idinetalye niya sa senado na sa flood control at road construction napunta ang realignment kung kaya’t walang bago sa mga expose ni Andaya.
Sa kabila nito hinikayat ng senador si Andaya na maglabas ng mga dokumento sa mga posibleng bagong akusasyon at sasamahan niya ang kongresista sa paglaban dito.
Simula’t simula pa umano ay tutol sa anomang uri ng pork barrel ang mga mambabatas kaya simula nang maging senador ay hindi siya tumatanggap ng pork.
(CYNTHIA MARTIN)
62 mambabatas apektado ng dagdag bawas sa Kamara — Drilon
IBINULGAR ni Senate Minority Leader Franklin Drilon na hindi ordinaryong itemization sa P79-bilyong budget ng mga kongresista ang ginawa ng liderato ng Kamara kundi realignment ng budget ng bawat distrito.
Kasunod ng pag-amin ni Drilon na may dalawang kongresista mula sa Visayas at sa Luzon na nagkaroon ng dagdag bawas pabor sa mga mambabatas na kaalyado ni Speaker Gloria Macapagal Arroyo.
Ayon kay Drilon, mismong ang dalawang kongresista ang nagsabi na 62 mambabatas sa Mababang Kapulungan ang tinapyasan ng budget sa distrito lalo ang mga kaalyado ng dating House Speaker Pantaleon Alvarez.
Kasabay nito hiniling ni Drilon kay Finance Committee Chair Senadora Loren Legarda na humingi ng kopya ng mga detalye ng ginawang realignment ng house matapos aprobahan sa Bicam at ratipikasyon ng senado at kongreso.
Dagdag ni Drilon, kung talagang ipipilit ng Kamara sa kanilang pagbabalik sa 20 Mayo, kanyang hihilingin ang reconvene ng Bicameral Conference Committee para sa 2019 national budget.
(CYNTHIA MARTIN)
