Lady service crew tinapik sa puwit Koreano arestado

HINULI ang isang Korean nang bastusin ang isang service amba­ssador crew sa loob ng isang hotel-casino sa Pasay City, nitong Lunes.

Nasa detention cell ng Pasay City Police ang suspek na si Lim Deuk Youl, 49, may asawa, isang Korean national, at naninirahan sa Saracota Residential Resort Cluster 5, Room 23, Newport City, Barangay 183, Villamor sa nasa­bing lungsod.

Kinilala ang bikti­mang si Sharlene Gison, 24, dalaga, isang service ambassador crew sa Resorts World Manila (RWM) sa Bgy.183, Villamor, Pasay City.

Base sa ulat ni SPO2 Maricel Garcia, may hawak ng kaso, naganap ang insidente sa loob ng Grand  Wing, RWM, 5:00 ng madaling araw.

Ayon sa imbes­tiga­syon, pagkatapos ma­ku­ha ng biktima ang inorder na pagkain ng sus­pek at kasama ni­tong lalaki, tinanong umano ni Gison kung saan ilalagay ang kani­lang mga inorder.

Habang naghihintay ng sagot, kinolekta ng biktima ang mga naga­mit na tasa ng kape sa mesa, nang biglang tapikin o paluin umano ng kamay ng suspek ang puwitan ni Gison, bagay na pinagtawanan pa ng kasamang lalaki ni Youl.

Dali-daling humingi ng tulong si Gison sa guwardiyang si Rose­belt de Guzman at ipinahuli ang nasabing dayuhan.

Isinailalim ang sus­pek sa inquest proceed­ings sa Pasay Pro­secutor’s Office para sa kasong unjust vexation.

(JAJA GARCIA)