HATAW! D'yaryo ng Bayan hatawtabloid.com
DALAWANG basag kotse at dalawang holdaper ang napatay makaraang makipagbarilan sa mga operatiba ng Quezon City Police District (QCPD) sa magkahiwalay na operasyon, kamakalawa ng gabi at kahapon ng madaling araw.
Sa ulat kay QCPD director, Chief Supt. Joselito Esquivel, ang unang insidente ay naganap dakong 8:35 pm sa Arburetum Road, Barangay Old Capitol Site, Quezon City.
Nauna rito, natuklasan ni Lorenz Cordero na binasag ang salamin ng kanyang Toyota Innova at nawawala ang kanyang laptop at iba pang gamit, habang nakaparada sa parking lot ng Jollibee Philcoa, Commonwealth Avenue, Quezon City.
Ipinaalam ng biktima ng insidente sa security guard.
Nagkataon kumakain sa fastfood ang mga operatiba ng District Special Operations Unit (DSOU) na nagpapatrolya sa lugar kaya, nalaman ang insidente.
Sa tulong ng saksi, nakita nila ang dalawang suspek na tumawid at dumaan sa footbridge sa kabila ng Commonwealth Avenue. Nakasuot ng orange at green long sleeve ag dalawa.
Agad sinundan ng grupo ng DSOU sa pangunguna ni Insp. Jennifer Cabigan ang dalawang suspek.
Namataan ang mga suspek sa Arburetum road pero imbes sumuko, kanilang pinaputukan ang mga operatiba kaya nagkaroon ng shootout na nagresulta sa pagkamatay ng dalawang suspek.
Narekober sa dalawa ang isang kalibre. 38, isang kalibre .45, apat na sachet ng shabu, MacBook Air laptop at iba pang gamit ni Cordero.
Samantala, dakong 3:15am kahapon, nang ma-enkuwentro ng mga operatiba ng QCPD Police Station 6 ang dalawang holdaper sa Brgy. Holy Spirit, Q.C. Bago ang insidente, nakatanggap ng tawag ang pulisya na may apat na kalalakihan ang kahina-hinalang umaaligid sa isang nakasaradong convenience store sa Sto Nino St., Brgy. Holy Spirit.
Nang respondehan, naabutan na dinidistrungka ng mga suspek ang kandado ng tindahan.
Nang sitahin, nagpulasan ang apat dahilan para habulin ng mga operatiba. Sa pagtakas ng mga suspek, pinaputukan nila ang mga pulis kaya nagkaroon ng barilan na nagresulta sa pagkamatay ng dalawa habang ang dalawa naman ay nakatakas.
Narekober mula sa mga suspek ang dalawang kalibre .38 baril.
Patuloy na inaalam ng pulisya ang pagkakilanlan ng apat na napatay.
(ALMAR DANGUILAN)
