HATAW! D'yaryo ng Bayan hatawtabloid.com
NAGMISTULANG bids and awards committee (BAC) ng gobyerno ang Department of Budget and Management (DBM) sa pamumuno ni Secretary Benjamin Diokno nang isalang sa bidding nito ang P198-bilyong proyekto ngayong taon.
Ayon kay Majority Leader Rolando Andaya Jr., ang mga proyektong ito’y bahagi ng Build, Build, Build program ng administrasyong Duterte.
Sumingaw ang anomalya sa pagdinig ng House committee on rules noong Lunes na inako ng isang opisyal ng DBM na responsable sila sa bidding ng public works projects.
Ayon kay Andaya, naging one-stop megamall ng mga proyekto ang DBM para sa contractors.
Sinabi ni Bingle Gutierrez, executive director ng Procurement Service ng DBM, sila ang nagpa-bid ng mga proyekto ng ilang ahensiya ng gobyerno at government-owned and controlled corporations para sa mga big-ticket infra projects at iba pang mga kontrata mula 2017.
Kasama, umano, sa mga kontrata ang mga proyektong pagpatayo ng airports, railways at mass transport systems maging ang pagbili ng helicopter at mga kagamitan ng militar.
Giit ni Andaya, ang mandato ng Procurement Service ng DBM ay bumili ng office supplies para sa gobyerno kagaya ng envelopes, folders, ballpens, pencils, inks, computers at iba pang kagamitang pang-opisina na mas mura kapag binili nang bulto.
“Now, it has morphed into a super body responsible for the bidding of multi-billion government contracts,” mariing patutsada ni Andaya.
Aniya, ang mandato ng DBM ay pagsaayos ng National Expenditure Program, pero sa pamumuno ni Diokno, siya na rin ang nagpapasya kung sino ang makakukuha ng mga proyekto at kung sino ang babayaran.
“Hindi pala totoo ang sinasabi ni Sec. Diokno na hindi nakikialam ang DBM sa bidding at awarding ng government contracts. Hindi lang pala sila nakikialam. Sila na pala mismo ang nagsasagawa ng bidding at nagrerekomenda kung sino ang makakakuha ng mga proyekto,” ani Andaya.
“Mas magaling ba sa bidding ng airports at subway system ang mga taga-DBM-PS kaysa mga eksperto natin sa Department of Transportation? Mas mahusay ba silang bumusisi ng technical specification ng helicopters at iba pang military hardware kaysa Department of National Defense?” mariing tanong ni Andaya.
ni Gerry Baldo
