HATAW! D'yaryo ng Bayan hatawtabloid.com
PATULOY ang magandang takbo ng showbiz career ni Quinn Carillo na kabilang sa grupong Belladonnas. Ito ay binubuo ng seven talented young girls na bukod kay Quinn ay kinabibilangan nina Chloe Sy, Rie Cervantes, Xie Fabricante, Jazzy Dimalanta, Phoebe Loseriaga, at Tin Bermas.
Hindi pa man ipinalalabas ang launching movie nilang Codep mula sa pamamahala ni Direk Neal Tan at prodyus ng 3:16 Productions ni Ms. Len Carillo, may kasunod na project na agad si Quinn. Sa ngayon ay inaayos na ang isang inspiring dance-romance movie na mala-Step Up ang tema.
Napili ni Ms. Len ang team nina Direk Carlo Obispo para mamahala sa naturang pelikula na pagbibidahan ng Belladonnas front girl na si Quinn at ng ilang miyembro ng Clique V, plus iba pang member ng Belladonnas.
Abala ngayon ang team ni Direk Carlo sa pre-prod sa pelikulang ito na sa Subic balak i-shoot. Ayon naman kay Quinn, handa niyang ibigay at i-absorb ang lahat ng ituturo sa kanya ng critically-acclaimed director.
Anyway, kasama ni Quinn sa pelikulang Codep ang mga kapwa niya Belladonnas, Clique V at ilang veteran na sa showbiz tulad nina Ronnie Lazaro, Ana Capri, Via Veloso, at Rosanna Roces.
Ipinahayag ni Quinn na memorable sa kanya ang pelikulang ito. “Memorable po sa akin itong movie na ito na nakaeksena ko sina Sir Ronnie at Ms. Ana. Iyong movie po na Codep about sa college event na I could say, ‘yung mga issue na nae-encounter ng teenagers. Isa po itong advocacy film na drama. Iyong role ko sa movie, ako iyong pinakamabait at pinakamahilig mag-aral,” nakangiting esplika ni Quinn.
Sa ngayon bukod sa pelikula, tinatapos na rin ang unang album ng Belladonnas.
ALAM MO NA!
ni Nonie Nicasio
