HATAW! D'yaryo ng Bayan hatawtabloid.com
NAKARAMI na rin ang young actress na si Pauline Mendoza ng TV series sa GMA-7 na naging parte siya. Pero nagmarka nang husto si Pau (nickname ni Pauline) sa Kambal Karibal.
Sa pagkakaroon niya ng pangalan, may kaakibat na mga basher rin ito. Sa panayam namin sa kanya, nabanggit ng Kapuso actress na ayaw na niyang pumatol sa mga bashers dahil ayaw niya ng negative vibes.
“Hindi na po tito, dine-deadma ko lang kasi ayaw ko po ng negative vibes na pumapasok sa life ko. More on positive vibes po ako,” wika ni Pauline.
Pero, may instance ba na umiyak ka dahil sa isang issue o pagba-bash sa iyo sa social media?
Pag-amin ng aktres, “Mayroon po, sinabihan kasi ako na mabuti nga raw na nagka-cancer ‘yung nanay ko, kaya napaiyak po ako.
“Iyon po talaga ang pinakagrabe, kaya sinagot ko sila ng, ‘Hindi ninyo alam ang pinagdadaanan namin kaya huwag ninyong idamay ang family ko, lalo na ang nanay ko.’ Sabi ko, ‘Ako na lang, huwag na iyong nanay ko.’
“Masyado na po kasing below the belt kaya hindi ko napigilan ang sarili ko at sinagot ko po talaga,” esplika ni Pau.
Ang mother ni Pauline ay may stage-3 breast cancer. Two years ago nang ma-diagnose ang karamdaman ng ina ni Pau.
Inilinaw din ng 18-year old na aktres na wala siyang alam sa nangyaring intriga kina Bianca Umali, Kyline Alcantara, at Miguel Tanfelix. Kaya nagtataka raw siya kung bakit nadamay ang pangalan niya sa issue sa tatlo.
“Nadamay lang po talaga ako dahil magkakasama kami sa Kambal Karibal, so wala naman silang ibang pagtatanungan. Basta po malinis ang konsensiya ko, wala po akong ginagawang masama at pareho ko po silang mga kaibigan.”
Dagdag ni Pau, “Sa totoo lang po, kapag magkakasama po kami nina Bianca at Kyline, nina Miguel, hindi po namin napag-uusapan, kami pong apat. Okay naman po kaming lahat ngayon.”
Anyway, sa kasipagan at sa kagustuhang puro positive vibes lang ang focus niya, sunod-sunod ang mga guesting ni Pau mula nang nagtapos ang serye nilang Kambal Karibal. Katatapos lang niya sa Wish Ko Lang, at mapapanood din si Pau sa AHA, Mars, Maynila, at Imbestigador.
ALAM MO NA!
ni Nonie Nicasio
