HATAW! D'yaryo ng Bayan hatawtabloid.com
BILANG tulong sa mga nagangarap na maging artista, magbibigay si Mike Magat ng libreng acting workshop.
Ayon sa actor/director, ito ay para lamang sa mahihilig mag-artista at seryosong pasukin ang mundo ng showbiz.
Esplika niya, “Gusto ko lang makatulong sa mga katulad ko rin na nangarap noong panahon na wala rin akong pang-enrol sa acting workshop. Ito na ‘yung gift ko sa birhday ko this September, na makapag-share man lang ng blessings sa kapwa na may pangarap din sa buhay.
“Marami kasing gustong umaarte na hindi nila mailabas ang kanilang talent dahil sa kawalan nang pangmatrikula, para mag-enrol.
“Pero sa mga mapipili ko, sila iyong wala nang bayad, pero kailangan nilang mag-sign ng contract sa mga gusto talagang pasukin ang showbiz. Lalo na ngayon na may sarili na akong production na pang-international release.”
Kaya masuwerte ang mapipili rito dahil may libre nang acting workshop, may project pa agad. “Yes, napakasuwerte nga, basta makita ko lang talaga na seryoso at may pangarap talaga sila. Ito na ‘yung magbubukas sa kanila ng pinto para sa chance na makapasok sa showbiz,” pakli ni Mike.
Dagdag niya, “Basta lang, kailangan silang maging professional at may good moral at walang attitude. Kaya daraan pa rin sila sa test, mahalaga kasi talaga ang mga bagay na ito, e.”
Ilan ba ang kukunin niya sa kanyang acting workshop? “Basta kung ilan lang ang magustuhan natin, wala namang limit iyan at alam naman natin kung puwede talaga silang maging artista o hindi.”
Si Mike ay napapanood ngayon sa TV series na Contessa sa GMA-7. Marami rin siyang proyektong pinaplano at kasalukuyang tinatapos ang international movie na Turista na siya mismo ang bida at director.
Target ni Direk Mike na magsimula ang naturang free acting workshop asap. Magaganap ito every Sunday at tatakbo hanggang September 16. Para sa mga interesado, mag-email sa [email protected]. Ang mapipili rito ay posibleng makasali sa international movie na Turista.
ALAM MO NA!
ni Nonie Nicasio
