HATAW! D'yaryo ng Bayan hatawtabloid.com
COMATOSE ang isang empleyado ni Special Assistant to the President (SAP) Christopher “Bong” Go, nang magbaril sa sarili sa bodega ng kanilang tanggapan sa Davao City kahapon.
Batay sa police report na ibinigay sa media kahapon, tinamaan ng bala ng cal. 38 sa ulo si Leo Angelo Apara, 38, regular employee ng Davao City Hall at nakatalaga sa Office of the Special Assistant to the President (OSAP) sa Veloso St., Brgy. 20-B Bo. Obrero, Davao City.
Batay sa testimonya ng saksing si Lourdes Avenido Gonzales, 43, staff sa OSAP, nakita niyang pumasok sa stock room si Apara at matapos ang ilang minuto ay nakarinig siya ng putok mula sa silid.
Natagpuan niya na duguang nakahandusay sa loob ng stock room ng kanilang opisina si Apara at agad dinala sa San Pedro Hospital.
Narekober sa bodega ang isang .38 caliber revolver na may serial #ZL99769, may apat na bala at isang basyong bala. Inaalam ng mga pulis kung sino ang may-ari ng baril at bakit dala ito ni Apara.
(ROSE NOVENARIO)
