HATAW! D'yaryo ng Bayan hatawtabloid.com
INIHAYAG ni Metropolitan Manila Development Authority (MMDA) General Manager Jojo Garcia, 12 kawani ng ahensiya ang positibong gumagamit ng ipinagbabawal na droga at karamihan sa kanila’y traffic enforcer.
Sa press briefing kahapon, sinabi ni Garcia, pansamantalang hindi muna pinangalanan ang mga kawani na gumagamit ng ilegal na droga.
Ayon kay Garcia, anim sa nabanggit ay nasa job order status, kaya awtomatikong tanggal sila sa trabaho.
Habang ang anim ay nasa casual at permanent status, kung kaya’t isasailalim sa due process.
Sa random drug test na ipinatupad ng MMDA sa kanilang tanggapan, 13 ang naunang nagpositibo sa paggamit ng droga ngunit 12 lamang ang pumasok sa tinatawag na confirmatory test.
Sinabi ni Garcia, nasa 1,000 kawani ng MMDA ang ipinatawag para isailalim sa ipinatutupad na random drug test ng ahensiya, na nagsimula noong 22-24 Mayo 2018.
Ngunit ang 20 porsiyento rito ay hindi nakapunta dahilan upang isyuhan ng memorandum para sa posibleng pagkasibak sa trabaho.
(JAJA GARCIA)
