HATAW! D'yaryo ng Bayan hatawtabloid.com
PURSIGIDO ang actress na si Ara Altamira na maging matagumpay sa mundo ng showbiz. Siya ay isang Pinay na modelo-aktres na dating naka-base sa Indonesia at ngayo’y sinusubukan ang kapalaran niya sa sariling bansa. Bukod sa pagiging modelo sa naturang bansa, siya ay napabilang sa Top 15 Miss Popular DJ hunt finalist doon at nagkaroon ng cameo role sa pelikulang Takut Kawin sa Indonesia.
A couple of months ago ay napanood si Ara sa seryeng Pusong Ligaw ng ABS CBN kaeksena ang young star na si Sofia Andres. Mayroon din siyang maliit na papel sa successful na pelikula ni Direk Jun Robles Lana na Ang Dalawang Misis Reyes na pinagbidahan nina Judy Ann Santos at Angelica Panganiban.
Pero bukod sa pagiging aktres/model, si Ara ay isa ring singer. Isa siya sa tampok sa show ni katotong Direk Throy Catan na Voices of July na gaganapin sa Music Box sa July 15, 2018, Sunday, 8pm. Kasama ni Ara na magpe-perform dito sina Tori Garcia, Mavi Lozano, Andrew Gan, Anthony Rosaldo, Josh Yape, Maricar Aragon, Eric Constantino, Eumir Jay Rader, Andy Baluyot, Jennelyn Gagajena, at ang guwapitong anak ni Allona Amor na si Nash Tillah.
Gaano ka nag-e-enjoy as a singer? Kung papiliin ka, saan mo gustong mas mag-focus, singing or acting?
Tugon ni Ara, “Kumakanta rin po ako, acoustic usually. Masaya ako kapag kumakanta, kasi iyon po ang time ko para i-release ang stress.
“I still want to focus on acting, pero as an artist, kailangan talaga na maging flexible, kailangan i-try ang lahat at i-explore ‘yung talents na mayroon ako.”
Nabanggit din niya na masaya siya sa kaliwa’t kanang exposures sa TV at pati sa mga event. “I’m very happy po, kahit na sobrang napapagod ako sa biyahe, walang tulog na maayos, pero sa tuwing nakikita ko ‘yung sarili ko sa TV, ang saya ko. ‘Tsaka kapag nakaririnig ako ng good comments na even sa directors pa mismo nanggagaling, nakatataba po ng puso.
“Kasi ito talaga ‘yung gusto ko, passion ko ang acting, kaya gusto kong mag-improve palagi,” nakangiting saad ng versatile na si Ara.
Anyway, for Tickets para sa show na Voices of July, pls. call 09158507388 (02)5031309.
ALAM MO NA!
ni Nonie Nicasio
