Miyembro ng basag kotse gang tiklo sa akto

NATIYEMPOHAN ng mga alagad ng batas habang binabasag ang salamin ng isang naka­paradang kotse ang isang miyembro ng Basag Kotse gang sa Makati City, kahapon ng madaling-araw.

Hindi nakapalag nang arestohin ng mga awto­ridad ang suspek na si Robert Adriano, 26, resi­dente sa Brgy. 254, Zone 23 sa Maynila.

Ayon kay Makati City Police chief, S/Supt. Rogelio Simon, dakong 1:15 am nang mangyari ang insidente sa bahagi ng Dela Rosa St., sa tabi ng Kings Court Building sa Brgy. Pio Del Pilar, ng lungsod.

Naaktohan ng mga awtoridad ang suspek habang binabasag ang salamin ng pulang Toyota Innova na nakaparada sa nasabing lugar.

Sa puntong ito, agad inaresto ang suspek na hindi nakapalag habang hawak ang isang screw driver na ginamit sa pagbasag ng salamin.

Bukod dito, nakom­piska rin sa suspek ang isang balisong, isang plastic sachet ng hinihi­nalang shabu, sling bag at wallet. Ang suspek ay naka­takdang sampahan ng kasong paglabag sa Republic Act 9165, illegal possession of deadly weapon at robbery.

(JAJA GARCIA)