HATAW! D'yaryo ng Bayan hatawtabloid.com
SUNOD-SUNOD ang suwerte ng grupong Ex Battalion simula nang maging manager nila ang aktres na si Ai Ai delas Alas. Nagkaroon na sila ng mommy, nagkaroon pa sila ng mabait na manager.
Noong Biyernes, inihayag ang pakikipag-collaborate ng Comedy Queen sa Viva. Inihayag din ang pagsabak sa acting para sa gagawing movie gayundin ang major concert, at recording artists ng Viva Records.
Ayon sa grupo, bago sila isabak sa pag-arte, isinabak muna sila ni Ai Ai sa acting workshop. ”So, hindi na kami nabigla. ’Yung basic sa acting at guidance sa amin ni Mom Ai-Ai bilang veteran actress, naisi-share niya sa amin,” tugon ng isa sa miyembro ng Ex Battalion.
Hindi naman itinago ni AiAi ang kasiyahang aarte na ang kanyang mga alaga. At simula nang alagaan niya ang mga ito’y nababayaran na ng tama ang mga bata.
“Oo, nababayaran na sila nang tama. Hindi sila uubra (sa akin). ’Yung nabalita rati, ka-member nila ’yon. Hindi sila ’yon. Ka-member nila ’yung hindi nabayaran, kasi ini-expect ng producer, sila ’yung lalabas. Hindi ’yung ex members ng Ex Battalion.
“So parang nagagalit ang mga tao kasi wala sila roon. Pero ka-member nila ’yon. So far, wala pa naman. Hindi pa naman kami nasusuba, praise God!” sambit nito.
Samantala, iginiit naman ng Ex Battalion na kaya nagustuhan din nila ang pagpirma sa Viva Records ay dahil binigyan silang kalayaan sa kanilang musika. Ibig sabihin, hindi pakikialaman ng Viva ang klase o tema ng kanilang musika.
Uumpisahan namang i-shoot ang pelikula nila sa July na isinulat ni Mel del Rosario at ididirehe ni Dado Lomibao. Ito bale ang pagbabalik ni AiAi sa Viva.
SHOWBIZ KONEK
ni Maricris Valdez Nicasio
