HATAW! D'yaryo ng Bayan hatawtabloid.com
NABUWAG ang sindikato ng pekeng US dollars makaraang madakip ang limang Cameroonian nationals at isang Filipina sa ikinasang operasyon ng mga operatiba ng Quezon City Police District-District Special Operation Unit (QCPD-DSOU), kamakalawa ng gabi sa lungsod.
Sa ulat ni Supt. Gil Torralba, DSOU chief, kay QCPD director, Chief Supt. Joselito Esquivel, kinilala ang mga arestadong sina Bame Jacob, 42, auto mechanic, residente sa 5th Ave. Condo Place, Bonifacio Global City; Ogie Oscar Mbang, 48, businessman, residente sa Guadalupe, Makati; Tangang Yannick Ndare, 27, estudyante, nakatira sa Guadalupe; at Aly Camara,33, nakatira sa St. Francisco Street, Sta. Rosa, Laguna.
Arestado rin sina Michael Amungwa, 42, isa ring Cameroonian, at Ma. Ruby Verzosa, 55, Filipina, dahil sa tangkang panunuhol ng P200,000 sa mga operatiba.
Habang ang mga biktimang nakabili ng pekeng dolyar ay sina Nancy Payumo, 40, Peter Telan, 58, Leonardo Bernardo, 46, at Evelyn Tuason.
Ayon sa mga biktima, noong Abril 2018, nakilala nila ang mga suspek at ipinakita sa kanila kung paanong magmistulang genuine ang pekeng dolyar sa pamamagitan ng isang kemikal na inimbento ng sindikato.
Para makombinsi ng sindikato ang mga biktima, dinala sila sa isang hindi kilalang lalaki at binentahan ng pekeng $100 na nilagyan ng kemikal.
Kinompirma ng lalaki na genuine ang dolyar at binili ang $100 ng P5,200 sa mga Cameroonian.
Makaraan makombinsing bumili ng mga pekeng $100 ay hinikayat naman sila na bumili ng kemikal sa halagang P300,000.
Nitong 16 Mayo 2018, dakong 1:00 pm., sa parking area ng Trinoma ibinigay ang P300,000 ng mga biktima sa mga suspek para sa kemikal.
Ngunit nitong 21 May 2018 sa nasabi ring lugar, nagkita ulit ang mga biktima at suspek para sa delivery ng kemikal ngunit binigyan lamang sila ng mga pekeng 100 US dollars na nakalagay sa transparent plastic at pinangakuhan na sa 23 May pa ang kemikal at sa SM North EDSA sila magkita-kita.
Dahil dito, nagpasya nang magreklamo sa DSOU ang mga biktima na nagresulta sa pagkakadakip sa apat miyembro ng sindikato dakong 7:30 pm kamakalawa.
Habang iniimbestigahan sa opisina ng DSOU ang mga suspek, dumating ang dalawa pang kasabwat ng apat na sinaMichael Amungwa, 42, isa ring Cameroonian, at Ma. Ruby Verzosa, 55, Filipina, at sinuhulan ang mga operatiba ng P200,000 cash kapalit ng pagpapakawala ng apat nilang kasamahan. Ngunit agad inaresto ni Torralba ang dalawa.
(ALMAR DANGUILAN)
