Nigerian inambus sa Las Piñas, patay

BINAWIAN ng buhay ang isang Nigerian national makaraan pagbabarilin ng hindi kilalang suspek sa Las Piñas City, nitong Lunes ng umaga.

Kinilala ang biktimang si Didicus Ohaeri, taga-Bacoor, Cavite.

Sa inisyal na imbestigasyon ng Las Piñas Police, binabagtas ni Ohaeri ang Alabang-Zapote Road sakay ng kanyang kotse nang pagbabarilin siya ng mga suspek na magkaangkas sa motorsiklo dakong 11:30 ng umaga.

Ayon sa mga pulis, dati nang sinampahan ng District Drug Enforcement Unit ng Southern Police District si Ohaeri ng reklamong may kaugnayan sa ilegal na droga.

Patuloy pang iniimbestigahan ang posibleng motibo at mga suspek sa pamamaril.