HATAW! D'yaryo ng Bayan hatawtabloid.com
NAGSISILBING hulmaan ng mga susunod na pinuno ng bansa ang Palarong Pambansa dahil ito’y nagtataguyod nang pagsusumikap, disiplina, teamwork, integridad at pagmamahal sa bayan.
Ito ang inihayag ni Pangulong Rodrigo Duterte sa kanyang talumpati sa pagbubukas ng Palarong Pambansa sa Elpidio Quirino Stadium sa Bantay, Ilocos Sur kahapon.
Binigyan diin ng Pangulo, ang sports ang nagsisilbing daan upang maiwaksi ang kabataan sa illegal drugs, kriminalidad at iba pang gawaing labag sa batas.
Ang kanyang administrasyon aniya ay patuloy na ikakampanya na mapuksa ang mga problema sa lipunan upang matiyak ang isang ligtas at progresibong kinabukasan para sa atin sa kasalukuyan at susunod na mga henerasyon.
“The government remains steadfast in promoting physical education, encouraging sports programs and supporting athletes, especially as they compete in international events,” anang Pangulo.
Pinayohan ng Pangulo ang mga estudyante na huwag pabayaan ang kanilang pag-aaral kahit abala sila sa pagpapakahusay sa sports.
Hinimok ng Pangulo ang mga magulang na suportahan ang kanilang mga anak at gamitin ang mga posibilidad para sa pag-unlad ng potensiyal nila.
“To the parents, there is no better way to show your love for your children than to help them realize their potential,” aniya.
“Rest assured that this administration will never stop working hard to make the Philippines a better nation. We, however, cannot do this alone. We call for your participation in making our national plans and programs tangible,” dagdag ng Pangulo.
(ROSE NOVENARIO)
