HATAW! D'yaryo ng Bayan hatawtabloid.com
INAMIN ni Pangulong Rodrigo Duterte, tatlong sundalo o pulis kada araw ang napapatay ng special partisan unit (SPARU) o mas kilala bilang Sparrow unit ng New People’s Army (NPA) sa buong bansa.
Pinayohan ni Duterte ang mga tropa ng pamahalaan na maging mapagmatyag at alerto sa mga nagkalat at aktibong muli na urban hit squad ng NPA lalo na’t may direktiba ang pamunuan ng Communist Party of the Philippines (CPP) na paigtingin ang operasyon laban sa kanila nang tuldukan ng Punong Ehekutibo ang peace talks sa kilusang komunista.
Pinag-iingat ni Duterte ang sundalo’t pulis sa kanilang paligid , lalo kapag nasa bahay bunsod ng ilang insidente na tinambangan ang mga tropa ng pamahalaan habang nasa kanilang mga tahanan o kaya’y kapag namamalengke paglabas ng kampo.
Ito aniya ang dahilan kaya binigyan niya ng mga baril ang mga sundalo para proteksiyon sa NPA at naglunsad ng TienDA ng Bayan ang Department of Agriclture upang ang kagawaran ang magsu-supply ng pangangailangan ng mga tropa ng pamahalaan, sa bahay at kampo.
Ang target aniya ng sparrow ay dalang baril ng mga sundalo’t pulis.
(ROSE NOVENARIO)
