HATAW! D'yaryo ng Bayan hatawtabloid.com
HINIHINALANG nahulog mula sa bus na sinasakyan ang isang lalaking pasahero na natagpuang wala nang buhay sa Parañaque City kahapon ng madaling araw.
Pinaniniwalaang sanhi ng matinding pinsala sa ulo, namatay noon din ang biktimang si Ramil Legaspi, 42, ng 212 San Andres St., Navotas City.
Natagpuan ng bystanders ang biktima na walang buhay dakong 2:05 kahapon ng madaling araw sa northbound Roxas Boulevard, Brgy. Baclaran, Parañaque City.
Base sa ulat na nakarating sa Southern Police District (SPD), sa pahayag ng taxi driver na si Jerry Cruz, ipinaparada niya ang kanyang taxi na may plakang TYZ 698 sa harapan ng isang KTV bar sa naturang lugar para maghintay ng pasahero nang tawagin ang kanyang atensiyon ng isang bystander na kinilala sa alyas William.
Ipinagbigay-alam kay Cruz ni alyas William, na isang lalaki ang hinihinalang nahulog sa isang pampasaherong bus.
Nakita nila ang biktima na nakahandusay sa kalsada at walang buhay.
Kaagad na ipinagbigay alam sa mga awtoridad ang insidente at kinilala ang biktima sa pamamagitan ng identification card na nakuha sa kanya. Ang bangkay ng biktima ay pansamantalang inilagak sa Peoples Funeral Services para sa autopsy.
Inaalam ng pulisya kung anong bus ang sinakyan ng biktima para sa mas malalim na imbestigasyon.
(JAJA GARCIA)
