Orlando Sol, hahataw ang showbiz career ngayong 2018!

MARAMING nakalinyang projects ngayon si Orlando Sol. Una na ang pagiging bahagi niya ng GMA-7 TV series na The One That Got Away. Tapos ay may stage play din siya, plus, ang next single niya ay pinaplantsa na rin.

Ang launching movie niya ay malapit na rin simulan kaya sobrang thankful siya sa mga nangyayari sa kanyang career. “Opo, sobrang nagpapasalamat talaga ako sa mga dumarating sa aking projects. Thankful ako kay Direk Maryo J. delos Reyes dahil matagal ko na rin itong hinihintay,” saad ni Orlando.

Nagkuwento rin siya ng iba pa niyang projects. “Kasama po ako sa teleserye sa GMA-7, iyong The One That Got Away. Mon ang name po ng character ko rito, isang cameraman na babaero, mahilig sa chicks, hahahaha!” Nakatawang saad niya.

Dagdag ng actor na miyembro rin ng Masculado, “Tampok sa TV series sina Lovi Poe, Dennis Trillo, Rhian Ramos, Max Collins at iba pa, mula sa pamamahala nina Direk Mark Sicat Dela Cruz at Rado Peru.

“Ang role ko rito, co-worker ni Lovi Poe. TV-media kasi iyong company namin, ako iyong parang cameraman niya at nagpupunta kami sa iba’t ibang events, sa field kami kasi naka-assign.

“May stage play din po kami ni Miggs Cuaderno na ang title ay Uyayi ng Ulan. Bale, ito ay iikot sa iba’t ibang schools sa buong bansa. On tour po ‘yun sa iba’t ibang schools at provinces po, magsisimula ito this year po.

“Plus sa Star Music naman po, magmi-meeting pa po kami para sa next single ko. Bale, magre-revive raw ako ng song, pero hindi pa alam kung anong song.”