HATAW! D'yaryo ng Bayan hatawtabloid.com
INSPIRATIONAL drama ng 2018 agad ang handog ng Regal Entertainment Inc. sa moviegoers ngayong unang buwan ng bagong taon. Ito ay ang Mama’s Girl na pinagbibidahan ng Regal babies ng kanilang henerasyon na sina Sylvia Sanchez at Sofia Andres.
Sa presscon ng pelikula, tinanong si Sylvia kung ano ang pagkakaiba ng role niya bilang nanay ni Sofia saMama’s Girl sa mother role niya sa mga teleseryeng ginawa niya. Sabi ni Sylvia na natatawa, ”Loud ako rito eh, at saka sexy. Lume-level up, eh. Pero strong mom siya. Na no matter what, kahit saan siya magpunta, hindi niya iiwan ang anak niya.”
First time ni Sylvia na nakatrabaho si Sofia. At puring-puri ng una ang huli.
“Noong una, tinitingnan ko lang siya. ‘Pag hindi mo talaga siya kilala, iisipin mo na suplada siya. Pero sa akin kasi huwag mong i-judge ang isang tao, huwag kang basta-basta maniniwala sa sinasabi ng ibang tao, hangga’t hindi mo totally nakikilala ang isang tao. Para sa akin, mabait siya.”
Noong baguhang artista pa lang si Sylvia ay nakagawa na siya ng mga pelikula sa Regal. Ilang taon na ang nakararaan noong gawin niya ang huling pelikula niya rito. Kaya natutuwa siya na muli siyang kinuha ng nasabing kompanya para sa Mama’s Girl.
“Gusto kong sabihin sa inyo, thankful ako rito sa movie na ito,where in fact, sinabihan ko si Mothe Lily na, ‘Mother, ang tagal mo na akong hindi kinuha sa movie.’ So, ngayon bumalik siya sa akin, bumalik ako sa kanya, kaya thankful ako. At sabi ko, ‘Mother huwag mo na nga akong iwan.’ Naglolokohan kami.
“Kung ano man ‘yung istorya namin ni Mother Lily, sobra kong tinreasure ‘yun. Si Mother Lily ‘yung nagdiskubre sa akin. Pero kung ano man ‘yung kuwento namin, sobrang haba, kaya huwag na lang (ikuwento). Kung gusto ninyo mag-usap tayo ng isang araw, uupuan kita, hindi ko ididenay. Kasi walang dapat idenay. Kasi kung ano man ‘yung pinagdaanan ko, ipinagmamalaki ko ‘yun, dahil doon ako humugot ng lahat ng tapang. At kung mayroon mang nagtawa sa akin noon, thank you! Dahil sa inyo ako kumuha ng lakas at tapang. Ngayon nandito ako sa showbiz, masaya ako dahil binigyan ako ulit ni Mother Lily ng pelikula. Kung hindi kay Mother Lily, wala ako rito (sa showbiz). Malaki ang utang na loob ko sa kanya at hind ko ‘yun makalilimutan.”
Showing na sa January 17 ang Mama’s Girl na mula sa direksiyon ni Connie S.A. Macatuno.
MA at PA
ni Rommel Placente
