Digong dumistansiya sa pagbitiw ni Polong

DUMISTANSIYA si Pangulong Rodrigo Duterte sa pagbibitiw ng kanyang anak na si Paolo Duterte bilang bise-alkalde ng Davao City.

Sinabi ng Pangulo sa ambush interview sa Southern Philippines Medical Center, ipinauubaya niya sa anak ang pagpapasya kung itutuloy ang resignation.

“Well, sa kanya ‘yun. You… Hindi kita masagot. Hindi ako ‘yung nag-resign e. But nagtanong siya kagabi. Doon kami, nagkita-kita kami doon sa, ‘yung magkapatid, si Mayor [Sara Duterte] pati siya. Habang naghihintay kami ng balita, tinanong niya ako,” anang Pangulo.

Kuwento ng Pangulo, hindi niya inutusan si Paolo na magbitiw sa puwesto ngunit posible aniyang napundi na ang anak sa mga kinasangkutang usapin gaya ng pictorial ng panganay na si Isabelle sa Palasyo at pagkadawit sa P6.6 bilyong shabu smuggling.

“Sabi ko sa kanya, ‘Ikaw. You… you are in a position to do what is right. Kung ano lang ang tama sa iyo, gawin mo…’ Sabi ko, ‘Well, let the people decide. But if you think that there is a better [way] to do it, do what is right.’ ‘Yun lang,” dagdag ng Pangulo.

“I never suggested any resignation. Sabi ko, ‘Ikaw, you…’ Siguro ‘yung sa anak niya, ‘yung pictorial at ‘yung — baka nasaktan din siya noong ‘yung mga insinuation about ‘yung sa… Napuno na siguro,” anang Pangulo.

“Ipinatawag sila sa  Congress for nothing. Well, about the only thing that [inaudible] was this name, his name which appeared in a — and he considered it most unfair to… sa kanya,” dagdag ng Punong Ehekutibo.

(ROSE NOVENARIO)