Perkins, ‘di kontento sa unang laro sa PBA

NAKAPAGLISTA man ng mga solidong numero, inamin ni Jason Perkins na hindi siya kontento sa unang opisyal na laro niya sa Philippine Basketball Association.

Dinaig ng nagdedepensang kampeon na San Miguel ang Phoenix, 104-96 sa pagbubukas ng ika-43 taon Philippine Basketball Association sa Smart-Araneta Coliseum kamakalawa.

Kumayod si Perkins ng 10 puntos, 9 rebounds, 2 assists at 1 steal sa 21 minutong aksiyon para sa Fuel Masters. Solido ito para sa debut ng isang rookie pero nakulangan pa rin si Perkins.

“It wasn’t good. It wasn’t as good as I would’ve liked to play. But it doesn’t really matter how I played, we ended up losing,” anang ikaapat na pick sa 2017 PBA Rookie Draft.

Sa kabila kasi ng magandang numero, hindi niya naibigay ang lahat dahil nadale siya ng 5 fouls at 3 turnovers — bagay na kailangan niyang matutuhan at iwasan sa patuloy na pag-ani ng karanasan sa propesyonal na liga.

“It was a good learning experience for me. I learned a lot from it. All the players in the PBA, their IQs is a lot higher than it was in college,” dagdag ng dating manlalaro ng La Salle sa UAAP at Cignal sa PBA DLeague.

Nangako siyang sa paglaon ng panahon ay makukuha niya rin ang laro sa PBA at magiging mas matatag na basketbolista.

“I’m gonna play a lot better, I’m gonna work a lot harder. My IQ is gonna be higher next game. I’m gonna study the game a lot more. Hopefully, I’m gonna keep getting better, I’ll keep getting better every game and keep progressing,” pagtatapos niya.

Sunod na sasagupain ni Perkins at ng iba pang Fuel Masters ang KIA Picanto upang subukang masungkit ang kanilang unang panalo sa darating na 22 Disyembre sa Cuneta Astrodome.

John Bryan Ulanday